Националниот научен парк „Giant Panda“ во Кина

Националниот научен парк „Giant Panda“, кој (токму како што кажува и неговото име) е проектиран да импресионира прво со својата големина, а потоа и со својот уникатен архитектонски стил …

На површина од речиси 5.500 квадратни метри, овој популарен научно – образовен центар сместен е на единствениот пат до Bifengxia базата на кинескиот истражувачки центар. Ова не само што е важен транспортен јазол,  туку воедно е и прва станица за изградба на локален културен туризам.

Импресивната зграда, проект на China Southwest Architectural Design and Research Institute  е речиси нурната во тлото со цел да има што е можно помало влијание врз околината. Гледано од другата, прометната страна, објектот е всушност речиси потопен во густа бамбусова шума, така што само неговиот превртен лак ги потсетува луѓето на неговото постоење.

Мазната кривина на покривот се протега долж врвот на бамбусите водејќи ги посетителите до влезот, односно точката каде што зградата всушност се издига од земјата и за момент речиси лебди до највисоката точка за да во продолжение се врати на земја и да формира специјален Мобиусов прстен со три ливчиња. Надворешното обложување на фасадата користи вертикална метална завеса, црно – бел градиент во комбинација со заоблен волумен, а се со цел да имитира флексибилна панда, скапоцено суштество на кое му е потчинет целиот овој простор.

Локацијата, инаку, има одлични услови кога станува збор за сообраќај, но и кога е во прашање заштитата од бучава. Садењето бамбус се покажа како идеално решение, односно најдобра технологија за решавање на споменатите проблеми, а двослојниот ѕид на самата зграда во голема мера придонесе за создавање мирен простор скриен во срцето на градот Сечуан.

На овој начин, создадено е едно посебно доживување на просторот, односно искуство на бришење на границите кога станува збор за изложбен простор – посетителите можат непречено да прошетаат од внатрешна изложба во затворено до онаа на отворено, а сето тоа со помош на кружен брановиден кров. За разлика од конвенционалното затворено вештачко опкружување, овој проект настојува да донесе природна бамбусова шума, ладен ветер и сончева светлина во внатрешниот простор.