Москва и Техеран постигнаа договор за изградба на нови нуклеарни реактори во Иран

Москва и Иран денеска постигнаа договор за изградба на осум нуклеарни енергетски блокови во Иран, јави ТАСС.

Заедно со руско-иранскиот меѓувладин договор е потпишан и протокол од шефот на Росатом Сергеј Кириенко и раководителот на Организацијата за атомска енергија на Иран Али Акбaр Салехи.

Договорот предвидува изградба на два енергетски блока во иранската АЕЦ „Бушахр“ со можност за уште два. Според постигнатиот договор Иран планира изградба на уште четири енергетски блокови на други локации, што дополнително треба да бидат утвредени.

Нуклеарното гориво за иранските атомски централи ќе се произведува во Русија. Според протоколот потпишан денеска во Москва, употребеното гориво ќе се враќа во Русија за преработка и складирање.

Проектот за изградба на нуклеарните енергетски блокови во Иран, вклучително испораката на нуклеарно гориво, е гарантирана од МААЕ.