Министерот Незири против ограничување на движењето на старите возила

Министерот за економија Беким Незири очекува во наредните неколку години во Македонија да нема ограничувања за користење стари возила кои не ги исполнуваат еколошките стандарди или да се забрани нивно регистрирање.

– Како ресорен министер дадов негативно мислење за ова барање  и реков дека ќе направам детална анализа. Ценам дека таквата мерка ќе има големи негативни ефекти врз економијата, а со неа ќе бидат засегнати и граѓаните. Се работи за голема бројка од 100 до 150 илјади возила и мислам дека ќе претставува радикална мерка ограничувањето на нивното движење или, пак, оневозможувањето да се регистрираат. Сметам дека такво нешто нема да се случи во наредниве неколку години, – рече министерот Незири во одговор на прашање на денешната прес-конференција во Министерството за економија.

Тој истакна дека за 14 дена Министерството треба да ја информира Владата за позитивните и негативните мерки од воведувањето на таквата мерка.

– Според податоците што ги добивам од службите, јас како министер, но и Министерството за економија нема да поддржи ваква мерка. Мислам дека и Владата ќе има слух и оти ќе ја прифати анализата што ќе ја направиме, – нагласи Незири.

Комитетот за заштита на животната средина неодамна на седница на Владата побара да се разгледа можноста да се оневозможи регистрацијата на старите возила, за почеток со ЕУРО 0, а подоцна и со ЕУРО 1 стандард, или да биде редуцирано нивното движење во Скопје поради нивното партиципирање во загадувањето на градот.