Мегапроект под Балтикот: Данска започна со изградба на најдолгиот подводен тунел во светот

Данска го гради најдолгиот подводен тунел во светот, кој под Балтичкото Море ќе ја поврзе со Германија. За неколку години, тунелот Фемарнбелт ќе го скрати 45-минутното патување со траект на само седум минути со воз.

Цената на проектот е околу осум милијарди долари, а покрај железничкото поврзување, тунелот ќе има и автопат со четири ленти. Не само што ќе биде најдолгиот подводен тунел, туку и најдолгиот железничко – автомобилски тунел во светот.

Кралот Фредерик Десетти го посети градилиштето по повод поставувањето на првиот бетонски сегмент долг 217 метри, а до крајот на проектот ќе ги има вкупно 79.

Вкупната должина на тунелот ќе биде 18 километри, а се работи за таканаречен „потопен“ тип на тунел. Ќе биде поставен на дното на Балтичкото Море во ров широк 40 до 50 метри и длабок од 12 до 15 метри.

Тунелот е клучна компонента на Скандинавско-медитеранскиот коридор, транспортна мрежа која се протега на речиси 5.000 километри од Средоземното Море до Финска. Коридорот го преминува океанот и минува низ Алпите, но кога ќе стигне до Скандинавија, мореузот Фемарн ги принудува патниците да заобиколат 450 километри.

Планираната железничко – автомобилска врска ќе го скрати патувањето од Хамбург до Копенхаген од пет на помалку од три часа, а она за што на траектот му се потребни 45 минути, со автомобил ќе се минува за десет, а со воз за седум минути.

Сообраќајот во подводниот тунел ќе се одвива низ одвоении тунелски цевки, по една за секој правец. Ќе има и лента за итни случаи, а тунелот постојано ќе го надгледуваат камери од контролен центар во Копенхаген.