Македонски домови: Викенд куќа во Маврово – совршено прибежиште од градскиот метеж

Секој кој се упатил на викенд или одмор во Маврово, мора да ја забележи куќата која го привлекува вниманието. Во населбата „Маврови Анови“ непосредно над патот е поставена прекрасната викенд куќа на семејството Зенку од Гостивар која претставува совршено прибежиште од градскиот метеж и секојдневниот стресен живот. Проектот на оваа куќа е дело на еден од членовите на семејството, архитектот Арѓенд Зенки.

„Од желбата да се направи една викенд куќа која ќе ги задоволи потребите на нашето семејство, а воедно и ќе биде место за одмор, семејно дружење и прикладно пречекување на гости во еден амбиент, кој пружа духовен и ментален мир за сите нас, произлегува идејата да се започне со размислување околу настанувањето на оваа куќа. Локацијата е идеална за ваква куќа поради тоа што се наоѓа во непосредна близина на градот, природата е извонредна, водухот е чист, погледот прекрасен, условите кои ни ги пружа оваа локација може само да ги посакаме во нашата имагинација.“ – вели проектантот Зенки.

Оваа куќа го следи теренот кој е во пад, па така е распоредена на три нивоа со извесно повлекување. На најдолното, подрумско ниво се јавуваат две гаражи помеѓу кои се поставени скали кои водат кон приземјето каде е поставен главниот влез. Едната од гаражите во подрумот, со топла врска е поврзана со подрумската просторија која служи како остава и вертикалните комуникации кои се сочинети од скалишно јадро и лифт.

Главниот влез во куќата е поставен во приземјето, од бочната страна, додека во приземјето централната и главна позиција ја зазема дневната соба која е пространа и отворена, чии пространи прозорци на предниот дел пружаат прекрасен поглед кон Мавровското Езеро. Во склоп на дневната соба, на приземјето се поставени и трпезаријата и кујната од кои е овозможена директна врска кон двориштето. На приземјето, исто така е поставена и гостинската соба со сопствена бања и простор за одмор, додека на ова ниво се наоѓаат и дневен тоалет непосредно до вертикалните комуникации, тоалет до кој се пристапува од дворот, како и помошна кујна која има иристап од надворешната страна која е поврзана со терасата.

На катот се поставени три пространи спални соби и секоја од нив располага со сопствена бања, гардаробер и тераса, па така секоја од нив им овозможува на корисниците комплетна приватност и можност за уживање во секој миг поминат во нив.

Во склоп на оваа викенд куќа во засебен простор е поставен и базенот кој е целосно покриен и затворен и кој овозможува негово користење и во ладните зимски денови. Оваа просторија исто така содржи и дел за дополнителна фитнес рекреација.

Конструктивниот систем од кој е изведена оваа куќа е скелетен армирано-бетонски систем, додека фасадната обработка е од алуминиумски панели и термоизолационо стакло.

Во внатрешноста на овој објект може да се забележи префинетоста на вкусот на сопствениците, па така се користени природни бои и материјали кои даваат ненападен и пријатен амбиент во овој простор. Користени се материјали како дрво, гранит, стакло и кожа, а доминантни се тоновите на кафеавкаста, и боја на капучино, како и природната боја на дрвото.

Несомнено оваа куќа претставува извонредно модерно архитектонско здание, какво што ретко се гледа во нашата држава, а задачата на архитектот да осмисли една ваква куќа за сопствените потреби претставува предизвик повеќе, затоа што не е лесно да се задоволат потребите на изостреното идеалистичко око на ниту еден архитект.

Општи карактеристики:

Локација: Маврови Анови, Македонија

Изведба: 2008-2009

Инвеститор: Рашид Зенку

Архитект: Арѓенд Зенки

Структура: Армирано бетонска конструкција, финална облога „Алкобан“

Површина на локација: 2.500м2

Изградена површина: 350м2

Нивоа: подрум, приземје, кат