Порта3 – градежништво, архитектура и екологија Порта3 – градежништво, архитектура и екологија
Од 9 до 16 јули, во манастирот Св. Јоаким Осоговски кај Крива Паланка се одржа 25. сесија на Летната школа за архитектура, организирана од Архитектонскиот факултет при Универзитетот Св.Кирил и Методиј во Скопје.
Во својот континуитет од 25 последователни сесии, Летната школа негува дидактички и креативни начини на експериментирање, тестирање и вреднување на различни пристапи, алатки и техники кои влијаат и ја обликуваат архитектонската мисла и проектниот процес.
Овогодишната тема КОЛАЖ+МОНТАЖА+АСЕМБЛАЖ беше поставена од гостите-тутори Михил Ридајк и Џулиет Бекеринг, обајцата со посебни и етаблирани кариери како ко-основачи и активни творци во Neutelings Riedijk Architects, односно Bekkering Adams Architrecten, но и професори на ТУ Делфт, односно ТУ Ајндховен.
Во текот на работата на Школата, 24 студенти имаа единствена можност да учат директно преку предавања, презентации и интерактивни дискусии, како и практични опити во процесот на развивање на архитектонски концепти базирани на дадените техники.
Резултатите од 25-тата сесија на Летната школа за архитектура беа претставени на завршната изложба пропратена со орална презентација во исклучителниот работен простор кој го нуди стариот конак на манастирот Св. Јоаким Осоговски.
Извадоци од тоа беа собрани во книга која му беше врачена, покрај дипломата, на секој учесник како сублимација на целокупниот труд и преглед во процесот на работа. Презентираниот материјал, како и личните изјави на учесниците, сведочат за исклучително интензивно, поучно и продуктивно, но истовремено и пријатно искуство.
