Кулата на Калатрава ќе биде нов симбол на Дубаи

Шпанскиот архитект Сантијаго Калатрава победи на натпреварот за новата кула за набљудување во Дубаи.

Од идниот проект се очекува да стане нов симбол на Дубаи, и тоа нема да биде проблем кога се ангажира Калатрава, кој е познат по своите екстравагантни објекти. Иако висината на оваа кула сè уште не е прецизно дефинирана, се претпоставува дека ќе биде опасна конкуренција на познатиот објект „Бурџ Калифа“, чија висина изнесува 828 метри.

Дизајнот на овој објект на Калатрава е инспириран од фузијата меѓу традиционалната исламска и современата архитектура, пишува ArchDaily.

„Дубаи е место каде иновативната и револуционерна архитектура креира неверојатни чекори. Во нашето предлог-решение, ние ја обединивме традиционалната и архитектурата на 21 век“, изјави Сантијаго Калатрава.

Рендерите претставуваат објект од иглеста форма со опсерваторија поставена речиси на самиот врв.

Новата кула како и Dubai Creek Harbour се развиваат под покровителство на Dubai Creek Harbour and Emaar Properties, истата компанија која ја градела „Бурџ Калифа“.