Куќа во Ирачки Курдистан, надвор од конвенциите и анонимност

Во сложен и мачен геополитички контекст, една семејна куќа се обидува да се ослободи од актуелните животни обичаи и потребата да се најде нова архитектонска култура.

Во земја која постојано е малтретирана со војни и политичка и економска нестабилност, архитектурата често е обичен чин на „реконструкција“ што ги занемарува имплицитните барања за квалитет на дизајнот, за наместо тоа стриктно да задоволува технички и итни потреби.

Доказ за тоа е анонимната и униформа околина на Бакрајо, во градот Сулејманија во регионот на ирачки Курдистан, каде урбанизмот главно се карактеризира со сериско повторување на соседните парцели од околу 200 квадратни метри, пишува Domus.

Целта на бирото ZAKAA Architecture не била само да создаде семејно домување кое ќе ги задоволи функционалните потреби на клиентите, туку и, пред сè, да го разреши консолидираниот начин на размислување заснован на рамнодушност и прифаќање на однапред утврдени догми, во обид да се „втемели“ нова култура на живеење.

Објектот се појавува како скулптурален и препознатлив волумен благодарение на необична геометрија и обложувањето со цементни елементи со светли тонови и изразени вертикални фуги, кои ја нагласуваат вертикалната конструкцијата  и желбата за одвојување од околината.

Со оглед на близината до соседните згради и отсуството на каква било перспектива кон нанадвор, домот е замислен како интровертен бедем што спречува гледање внатре. Обвивка од брановидни ѕидови, со неколку наменски отвори, создава паравани и заштитени зони помеѓу балконите и вдлабнатините, притоа дозволувајќи природната светлина лесно да се филтрира внатре.

Мала градина, сместена позади, а не напред, како што обично бива, фаворизира протокот на вкрстена вентилација и ја збогатува околината со пријатноста на интимен и безбеден престој на отворено како природно продолжение на животот во куќата.

Внатре, во приземјето, флуиден и транспарентен простор ги поврзува заедничките простории кои од влезот гледаат на градината; на горниот кат, спалните соби уживаат заштитени и резервирани погледи од балконите и внатрешните пациа, со кои е врамено небото.