Куќа од тула | Aрхитектонско студио Leth & Gori

Оваа несекојдневна куќа од тула претставува дел од развојниот проект наречен “Mini-CO₂“, инициран од филантропската фондација Realdania. Целта на проектот подразбира развој на економични самоодржливи објекти со мала емислија на CO_2, вклучувајќи изградба на шест објекти со различен конструктивен пристап, сместени во Нибург, Данска.

Дизајнот на куќата од тула се базира на визија за креирање на објект кој живее и диши. Оваа визија е реализирана така што ѕидната конструкција е изведена од единствен материјал, глина. Така, со примена на блокови од глина и тула дефинирана е цврста, хомогена и едноставна надворешна обвивка. Надворешните ѕидови се дифузно отворени, овозможувајќи му на објектот да диши, како и во случајот со старите традиционални објекти од тула кои се покажале како издржливи. Редуцираниот пристап при користењето на конструктивните материјали го намалува бројот на споеви помеѓу различните материјали, како и можноста за потенцијални конструктивни грешки. На тој начин примената на ѕидови од полна тула, во комбинација со дрвена материјализација на ентериерот, резултира со создавање на робустна и здрава средина за живеење, балансирана внатрешна температура и ниска емисија на CO₂.