Куќа на Санторини – „монолит создаден од човекот“

Локалното биро Kapsimalis Architects го потпишува проектот за Monolithus, куќа за одмор на грчкиот острв Санторини, која е проектирана како распоред на геометриски форми обложени со цемент во земјана боја.

Сместена во близина на живописното село Финикиа, проектот на домот се темели на концепт на големо парче вулканска карпа која е еродирана со векови како би се отвориле простори. Ова резултирало со „монолит создаден од човекот“, бетонски блок со димензии 20 на 20 метри, пресечен со аголен распоред на дворови и тераси засенчени со високи ѕидови кои ја делат куќата.

„Се чини дека вештачкиот масивен камен е тука од секогаш, како парче од вулканска ерупција, обликуван од елементи на природата, највеќе од морето и ветерот. Природната ерозија разоткрива формации на полна маса и празнини, а постепениот процес на отстранување на каменот создава затворени и отворени простори за живеење “, велат проектантите.

Сместени на квадратна основа, две гостински соби со чајни кујни покрај примарната резиденција формираат V-облик што се отвора кон север, при што секој простор се поврзува со приватни дворови кои завршуваат во мали, индивидуални базени.

Челичните столбови ги носат перфорираните метални настрешници кои прават сенка на местата за седење покрај овие базени. Главната дневна соба и трпезарија на запад обвиткани се со поголема тераса што се спојува со предниот дел од куќата, каде што се скалите кои водат во подземна дневна соба.

Погоре, закривена, „еродирана“ форма содржи дополнителна спална соба со засводен кров, која е поврзана со подигната тераса што гледа на околниот пејзаж.

Внатре, просторите се проектирани да се добие чувство како во засолниште во пештера, со бели, аголни ѕидови кои исто така се проектирани да изгледаат како простори издлабени од монолитна карпа.

Парчиња рачно изработен мебел од бетон, црн камен, мермер, дрво, железо, кадифе, глина и стакло поставени се во внатрешните и надворешните простори.

„Во текот на летниот период и под заслепувачкото сонце, гостите ги користат малите базени за да се оладат на периметарот на монолитот, опкружен со диви шилести медитерански растенија“, велат архитектите.