Конзервација и реставрација на камбанаријата во манастирскиот комплекс „Св. Богородица Перивлепта“ во Охрид

Во тек е реализацијата на проектот за непосредна заштита на камбанаријата во манастирскиот комплекс „Св. Богородица Перивлепта“ во Охрид,  која е донација од познатиот научник од светски рамки, Михајло Пупин. Надлежната установа од областа на непосредната заштита, НУ Завод за заштита на спомениците на културата и музеј – Охрид, го изработи основниот проект за санациско-реставраторски зафати на објектот, кој подразбира промена на покривната конструкција и на покривниот покривач, како и превентивни мерки за санација на неговите фасади.

Административната процедура околу одобрувањето на проектот е при крај и се очекува почнување на работите во најскоро време. Во рамките на комплексот ќе продолжи и непосредната заштита на фрескоживописот во црквата „Св. Богородица Перивлепта“, а ќе се одвиваат работи за конзервација на манастирскиот конак, активности што се предвидени во Програмата на Владата на Република Македонија.

Манастирскиот комплекс „Св. Богородица Перивлепта“ е лоциран во средиштето на старото охридско градско јадро, на возвишението Дебој. Најзначајно одредиште во рамките на комплексот е црквата посветена на Богородица Перивлепта со градежни и сликарски фази од XII до XIX век. Од нив, особено се издвојува фрескоансамблот создаден во духот на палеологовската ренесанса од врвните мајстори Михајло и Евтихиј, чиј потпис е евидентиран на дваесетина места на славното сликарско дело.

Црквата е позната и како „Нов Свети Климент“ бидејќи, по уривањето на црквата на Плаошник во XV век, моштите на св. Климент се чувале во оваа црква сé до 2002 година. Во рамките на комплексот се наоѓаат и: предметната камбанарија, манастирски конак, гробот на Григор Прличев, Галеријата на икони и Седиштето на Митрополијата – споменични единици кои се сведоци на времето во кое се создавани.