Конференција за одржлив развој на Балканот – домаќини Скопје и Охрид

Промоција на научното истражување, меѓународната академска соработка, и отворање дебата за важноста на науката и истражувањето е целта на конференцијата со наслов „На вратата на Европската Унија: Улогата на науката и истражувањето во одржливиот развој на балканскиот регион“ што од 19 до 23 април ќе се одржи  во Скопје и Охрид.

Конференцијата е во организација на Хумболт и ДААД-клубот Македонија, алумни асоцијација која ги обединува корисниците на стипендии на престижните германски фондации ДААД и Александер фон Хумболт. На научната конференција ќе присуствуваат добитници на стипендии на оваа фондација од Балканскиот регионот, гости од Италија и Јордан, професори од Германија, како и  истражувачи од нашата земја.

Фондацијата Александер фон Хумболт е една од најреномираните во светот за поддршка на научната академска елита на глобално ниво, во чие семејство учествуваат повеќе од 27.000 врвни научници од сите дисциплини, вклучувајќи повеќе добитници на Нобеловата награда.