Порта3 – градежништво, архитектура и екологија Порта3 – градежништво, архитектура и екологија
Во кинеската провинција Сечуан, минатата недела започна изградба на репликата на еден од најпознатите бродови во историјата – „Титаник“. Кинескиот „Титаник“ ќе биде идентичен на оригиналот што потонал во 1912 година, но за разлика од него овој никогаш нема да потоне. Причината за тоа е едноставна.
Бродот се гради далеку од брегот, дури 1200 километри и никогаш нема да заплови. Замислен е како туристичка атракција во рамките на проектот за развој на туризмот во покраината Сечуан. Кога ќе биде готова, репликата на легендарниот брод ќе биде долга 269 метри, широка 28 метри, а во самиот брод ќе се наоѓа сала за балови иста како во оригиналниот „Титаник“, театар и базен.
Надворешноста на бродот ќе биде идентична со оригиналот, а гостите ќе можат да доживеат и симулација на ударот во ледениот брег, по кој „Титаник“ потона. Планирањето и конструирањето на кинескиот „Титаник“ траело полни две години. Точната цена на овој проект не е позната, но се проценува дека ќе достигне околу 145 милиони долари. Рокот за завршување е 2018 година.
Кинескиот „Титаник“ не е единствениот обид да се направи реплика на еден од најпознатите бродови во историјата. Австралискиот тајкун Клив Палмер ја имаше истата идеја и требаше да ја реализира оваа година, но проектот е одложен за две години.
