Капсули за спиење со соларно напојување – сместување за бездомници

Германскиот град Улм претстави уникатно решение за сместување на бездомници во текот на зимските месеци – топли капсули за спиење поставени во паркови и други места каде што се знае дека живеат бездомниците.

Градот, на 75 милји западно од Минхен, ги именуваше капсулите „УлмерНест“.

Кабините се направени од дрво и челик и можат да соберат до две лица, кои можат да се заштитат од студ и дожд. Обезбедена е и циркулација на воздухот. Соларните панели обезбедуваат енергија, а постои и радио мрежа што им овозможува на луѓето да комуницираат доколку немаат мобилен телефон. Луѓето кои користат кабини можат да ги отворат без да мора да се регистрираат, а потоа да ги заклучат одвнатре.

Кога ќе се отворат, социјалниот работник автоматски се известува. На тој начин може да ја посети кабината наутро. Корисниците можат да останат анонимни, а капсулите ги одржува, чисти и поправа добротворната организација „Каритас Улм Алб Донау“.

“Видовме некои ефекти од овој проект за кои никогаш не сонувавме дека може да се случат, како соседите кои наутро им послужуваат чај на корисниците на кабините. Исто така, градските власти секогаш давале голема поддршка на проектот, за што сме многу благодарни “, вели Флоријан, еден од авторите на проектот. Тој додава дека луѓето доаѓаат да се заблагодарат за обезбеденото засолниште, а тоа им значи многу на луѓето од организацијата.