Како ќе изгледаат супермаркетите на иднината?

Водечкиот италијански ланец на супермаркети „Coop Italia“, на саемот „Експо 2015“ во Милано, го претстави својот иновативен проект “Future Food District”, односно супермаркетот на иднината. Извесно е дека во иднина наместо со љубезните продавачи, почесто ќе се среќаваме со скенери и монитори. Но, каков е поточно овој концепт?

Просторот е организиран на начин кој на прв поглед изгледа збунувачки, бидејќи производите од различни „категории“ се нудат на едно место. Супермаркетот е всушност инспириран од природниот синџир на производство на храната. Така на пример, покрај свежите домати се наоѓаат конзерви со доматен сос, а покрај свежото грозје се наредени шишињата со вино. Супермаркетот на иднината има роботи кои помагаат во пакувањето на производите, а една од главните цели е поттикнување на интеракцијата: нема високи сталажи, па потрошувачите имаат визуелен контакт и можат непосредно да комуницираат. Идејата е да се создаде атмосфера како на класичните пазари.

Има голем број инсталирани монитори, кои наизменично се вклучуваат при движењето на потрошувачот, и кои на купувачите ќе им даваат информации за потеклото, хранливите вредности па дури и јаглеродниот отпечаток на секој производ. Купувачите , можат да користат посебна апликација преку која ќе ги наведат своите прехрамбени навики и вкусови, и на тој начин секогаш ќе добиваат препораки и сугестии при купувањето.