Порта3 – градежништво, архитектура и екологија Порта3 – градежништво, архитектура и екологија
Наречен „Flight of birds“, oбјектот е сместен на северниот брег на португалскиот остров São Miguel (св. Михаил) и претставува дело на португалскиот архитект Bernardo Rodrigues.
Иницијалната дизајн стратегија, инспирирана од локалната променлива и ветровита микроклима, имплементира ѕидна бариера како заштита од ветровите, истовремено формирајќи пацио и покриени атриуми, заштитени од честите дождови. Организацијата и позиционираноста на атриумите овозможува сите дневни и заеднички простори преку застаклената ѕидна површина да се отворат кон зеленото природно опкружување.
Типологијата на проектирање делумно го следи класичниот паладински и скамоци дизајн на централна организација, со двојна висина во дневниот престој и две странични крила, од кои едното ја опслужува кујната.
При дизајнот на објектот се инкорпорирани високи оџаци како симболичен сегмент на станбената архитектура и покриен внатрешен двор, а второто крило ги опслужува циркулациите низ приземјето и кон кровната тераса, која располага со отворени погледи кон северниот брег на островот.
