Импозантна вертикална структура нова икона на градот Виго, Шпанија

Arenas & Asociados, AM2 Arquitectos и NOARQ соработувале на проектот Halo, импозантна вертикална структура за поврзување која за кратко време стана нова икона на галицискиот град Виго, Шпанија.

Специфичната топографија на Виго, карактеристична за најнаселениот град во Галиција, претставува предизвик. Како одговор на оваа сложеност, Градскиот совет на Виго пред речиси една деценија ѝ даде живот на Стратегијата за одржлив и интегриран урбан развој „Vigo Vertical“.

Оваа амбициозна програма има за цел да ги реши проблемите кои произлегуваат од неправилниот терен на општината преку низа стратешки интервенции. Проектот Halo е дел од оваа стратегија, како најголема и најамбициозна интервенција во програмата. Оваа импозантна структура не само што го олеснува пешачкото поврзување помеѓу две населби во градот, туку стана и архитектонски орјентир, нудејќи воодушевувачки панорамски поглед на градот и привлекувајќи го вниманието на жителите и посетителите.

Новата структура решава вертикална разлика меѓу нивоата повеќе од 40 метри, поврзувајќи ја интермодалната станица Vialia Vigo, проектирана од Morphosis, со областа García Barbón. Се состои од лифтовска кула и кружен пешачки мост со дијаметар повеќе од 80 метри кој се издига над прометниот автопат со шест ленти. Сето ова е ослонето на само три точки: едната одговара на самата кула на лифтот, другите две потпори вклучуваат две вертикални турбини на ветер со дијаметар од 3,1 метри, кои служат за производство на електрична енергија за лифтовите.

Архитектите наведуваат дека кружната форма е реакција на проектот на Thom Mayne за интермодалниот комплекс. Фасадата на станицата се одликува со доминантна централна оска со голем застаклен влезен атриум. Прав пешачки мост усогласен со оваа оска би ги попречувал погледите од атриумот. Мостот затоа се оддалечува од централната оска, минимизирајќи го неговото визуелно влијание врз погледите, но без да се жртвува централноста во однос на станицата.

Кружниот мост, со ширина од 4,5 метри, овозможува панорамска патека што се отвора кон пејзажот на устието на Виго. Едната страна на мостот е опремена со покрив кој нуди заштита од лоши временски услови, додека спротивната страна останува отворена, овозможувајќи непречен поглед.

Конструкцијата се состои од просторна решетка обложена со бели панели и стакло. Надворешните страни на пешачките мостови и на лифтската кула се покриени со ламинирано калено стакло потпрено само на два раба. Стаклото има суптилен бел свилен премаз кој овозможува поглед од внатрешноста, но ја пренесува структурата со својата млечна боја и овозможува ноќното осветлување да ја осветли стаклената фасада како фенер над градот.

Процесот на изградба кој овозможи реализација на ваква импозантна структура во многу сложен физички контекст секако е вреден внимание. Структурата е поделена на девет модули, користејќи привремени кули на секои 25 метри за да ги поддржат. Секој модул е произведен во работилница за челик и поделен на четири дела кои се заварени на лице место. Деветте модули потоа се подигнати со голем кран лоциран во близина на центарот на кружниот мост. Работата траела 18 месеци.