Хотел „Театар“ во Битола – традиционален објект со модерен комфор

Битола е град кој едноставно освојува. Во срцето на овој наш стар конзулски центар, силно се чувствува пулсот на историјата и шармот на старите сокаци со силуети на преубавата традиционална архитектура. Тука се мешаат старото и новото, историското и модерното, традиционалното и авангардното. Овој град гордо чекори кон иднината, чувајќи ја својата богата ризница на култура, архитектура и историја. Токму во тоа централно градско јадро, сочувано и заштитено како културно-историско подрачје, се издигнува нов репер на традиционален хотел со модерен комфор.

Тоа е новиот градски хотел „Театар“, кој е изграден во стилот на традиционалната архитектура. Проектиран од архитектот Михаел Димитровски, овој објект изникнува во чипкастото урбано милје кон крајот на 2013 година. Постоечкиот објект на локацијата е срушен а на негово место се издигнува сосема нова градба. Објектот ве пречекува широко со своите дрвени масивни порти, зад чии високи камени огради се открива прекрасниот двор уреден со префинет вкус и традиционални обележја кои ја следат естетиката на објектот.

Надворешното обликување на објектот е условено од Министерството за култура – Управа за културно наследство, чии препораки се следени при изградбата на објектот. Концептуално објектот е замислен како мал, семеен хотел кој со својот амбиент, услуги и флексибилност ќе одговори на современите потреби на своите клиенти.

Објектот се состои од визба, приземје, кат и поткровје. Просторот од 100 м² во визбата, што има отворен карактер, припаѓа на „Интимен театар“ на режисерот Софија Ристевска, како прв независен приватен театар во Македонија кој функционира во сопствен простор. Истиот тој простор може тематски да се трансформира како мултифункционална сала за состаноци, банкети, предавања, концерти итн, сето тоа во склоп на ограничениот простор кој треба да одговори на бројните програмски содржини на хотелот.

Приземјето го содржи чардакот на хотелот со екстензија кон холот каде е сместен хотелскиот бар. На катот и поткровјето се сместени десетте соби, секоја различна со засебен идентитет. Од нив седум се еднособни опремени со „твин“ или „дабл“ кревети, две двокреветни (со брачен кревет) и една трикреветна, или вкупен капацитет од 18-21 легло.

Конструкцијата на објектот е армирано-бетонска со безгреден систем. Доминира употребата на природни материјали како мимикрија на старото градителство, па така надворешните ѕидови на приземјето се изведени од речен фугиран камен кој е поставен на надворешната страна од армирано-бетонското платно. Од внатрешната страна платното е обложено со гипс-картонски плочи монтирани на метална потконструкција, со поставување на термоизолација.

Надворешните ѕидови на катот се изведени од керамички блок, со поставување на термоизолациона контакна фасада, обложени со гипс-картонски плочи од внатрешна страна. Сите преградни ѕидови се изведени од гипс-картонски плочи на метална потконструкција.

Надворешниот лик е преточен и во внатрешноста на објектот, иако тоа не е зададено во условите од Министерството, но е нужно за оформување на логична слика за целиот објект. Во холовите е употребен локален гранит – тип Мариово. Декоративните елементи во јавните простори се изработени од дрво, следејќи ја локалната традиција. Украсните елементи на фасадата како и прозорците и вратите, исто така, се изработени од дрво, по нарачка.

Подовите на дворот и чардакот се изработени од камен. Со голем сензибилитет за естетика, вметнати се декоративни предмети со етно потекло најчесто од Битола и битолскиот крај. Овој хотел како да позајмил парче од мозаикот на минатото, доловувајќи слика на вистинското богатство на нашата традицонална архитекура во еден модерен контекст на стил и живеење.