Хотел „Буши ресорт и спа“ – урбана оаза во Старата чаршија

Кога преку Камениот мост од скопскиот плоштад ќе поминете низ влезот на Старата скопска чаршија, како да влегувате во некој друг свет. Иако има раздвиженост, се чувствува смиреност и се е некако побавно. Овде утрата мирисаат на тукушто сварено кафе, на бурек и симит погача.

Подоцна се појавуваат мирисите на кебапите на Дестан, и разноразните специјалитети од другите кафеани. Се слушаат, иако поретко, звуците на ковачите и лимарите, се довикуваат мајсторите. Но вистинското богатство на чаршијата се крие низ тесните и кривулести улички, живописниот изглед на дуќаните, старите анови, цркви и џамии.

Ја сакам Старата чаршија. Тука како сè уште да не е уништена душата на градот, место каде што многу работи започнуваат и завршуваат. Опстојува се уште, иако има загубено доста од својот шарм во ова време на транзиција, а многу стари занаети исчезнаа засекогаш од овие простори. Чаршијата привлекува голем број луѓе, особено туристи. Во неа се тргува, но таа е и место за одмор, прошетки, средби.

Сакам да шетам по нејзините улички, да гледам во излозите на дуќаните и во луѓето што минуваат. Уличките ве предизвикуваат да шетате, да разгледувате и откривате места кои не сте ги забележале порано. Ова е дел од Скопје кој чиниш, како да живее во времето кога е создаден. Се чини како времето да застанало овде и дека нема некои големи промени. Но и тука, од време на време се гради.

Еден од новоизградените објекти во Старата чаршија е хотелот „Буши ресорт и спа“. Сместен на атрактивна локација, во старото јадро на чаршијата, веднаш под Мустафа пашината џамија, во соседство со црквата Свети Спас, повеќе од една година работи успешно овој хотел со 5 ѕвездички. Хотелот има 48 соби. Однадвор тој изгледа воздржано, вклопен во опкружувањето, но веќе внатре чувството е сосема поинакво. Замислен како урбана оаза, хотелот нуди одмор од хаосот на градот. Собите, рецепцијата, рестораните како и останатите простории во хотелот визуелно се раскошни и елегантни, опремени со модерен мебел, со изобилство на текстури и нијанси на бои.

Посебен акцент е ставен на севкупниот амбиент и естетско доживување на просторот, во кој секоја просторија се третира поединечно, со што се создава посебна атмосфера. Собите за гости се светли и прозрачни, а ходниците се малку затемнети и мистични.

Она што веднаш го привлекува вниманието на посетителите на овој хотел се поставените и со вкус избрани уметнички слики, внимателно поставени низ целиот хотел, како и лустери и украси на Swarovski elements. Влијанието на уметноста врз естетиката на хотелот е присутна низ целиот простор, и заедно со архитектонските елементи создава на моменти драматични контрасти и разиграни просторни секвенци кои експериментираат со различни аспекти на светло.

Светлото во проектот игра важна улога, особено интересен детаљ се оградите на скалите направени од оникс и осветлени од внатре. Заедно со деталите од Swarovski elements, поставените витражи и уметнички интервенции придонесуваат просторот да зрачи со современост и космополитизам.

Ѕидовите се обоени во бела боја, што е во контраст со подовите обложени со гранит, мермер или травертин во потемни нијанси. Многу од ѕидовите и столбовите се обложени со дрво во боја на венге.

Хотелот во целост е опремен со слична палета на бои и текстура, со што се создало едно интимно опкружување во кое посетителите се чувствуваат како во елегантно уреден дом, за разлика од класичните и конфекциски уредени хотелски соби на кои сме навикнале. Присутноста на камен, гранит, мермер, стакло, облоги од дрво и начинот на нивната примена, оддаваат почит кон архитектурата на чаршијата и градот во кој се наоѓаат.

Фантазијата и реалноста комуницираат совршено вклопени низ уметничките интервенции и секојдневните предмети. Со својот единствен пристап, хотелот „Буши ресорт и спа“ ветува препознатлива понуда каква што досега не сте доживеале, а која ќе ги задоволи и најпробирливите гости. Впрочем, хотел со 5 звездички мора да ја оправда профинетоста и богатството во изразот и примената на материјали, како што ја наметнува намената на овој хотел.

Хотелот располага со ресторан за гостите што ноќеваат во него, како и ресторан кој е отворен за поширока публика. Со извонредната локација на хотелот, кој изгледа како да ја надвиснува чаршијата и визуелната и стварната физичка поврзаност со неа, од вториот ресторан се пружа прекрасен поглед кон Старата чаршија и градот. Навечер, кога ќе се запалат светлата низ градот глетката е уште поубава, мистична и романтична.

Во рамките на хотелот се наоѓа извонредно опремен спа центар, со внатрешен базен, парни бањи, солена соба, сауна како и соби за тајландска масажа. И, она што овој хотел го чини поинаков од останатите во градот, е неговата преубава надворешна тераса наменета за сите оние што во скопските топли денови сакаат да пијат кафе и да се дружат на свеж воздух. Сместена помеѓу хотелот и високиот ѕид од камен подигнат спрема Мустафа пашината џамија, оваа тераса нуди мир и поглед кон џамијата и убавата и необична фонтана сместена во аголот кон влезот, уште еден архитектонски детаљ кој го чини овој хотел поинаков.

Хотелот е граден четири години во духот на традицијата на чаршијата. Заедно со архитектот Биљана Јорданова, идеите ги добивале патувајќи низ светот и гледајќи многу светски хотели, вели Лалип, најстариот од браќата Буши. Хотелот веќе ја потврди својата успешност кога е прогласен за најдобар хотел во Македонија. Неговиот ресторан во изборот за најдобар ресторан е прогласен за втор најдобар во македонската богата понуда на ресторани.