Градинката Учењак: Архитектонскиот бисер на Љубљана доби модерен изглед

Проектот за сеопфатно реновирање и доградба на градинката Учењак во Љубљана е заеднички потпишан од локалното архитектонско биро od-do architecture и бирото Navor од Цеље. Овој објект со уникатна форма, материјализација и палета на бои се издвојува од кутијастите форми на типичната типологија на градинки.

Со својата динамична архитектонска композиција, фасада од тули, светли дрвени волумени и зелени прозорски рамки, оваа градинка од 2.000 квадратни метри не остана само олицетворение на постмодернизмот од осумдесеттите, туку органски се развивала со текот на времето.

ДОДАВАЊЕ НА ИСТОЧНО КРИЛО

Објектот е проектиран во 1970-тите години од архитектот Јоже Добрин, еден од пионерите на повоената изградба на градинки во Југославија, но на почетокот на новиот милениум, приземната зграда барала сеопфатно реновирање.

Проектот на реновирање го надгледувал архитектот Горазд Равникар, додавајќи и источно крило со впечатлив покрив „пеперутка“.

Како што објаснуваат архитектите, во последните години, како дел од систематското енергетско обновување на јавните објекти во градската општина Љубљана, поставена е задача и за реновирање и проширување на градинката Учењак.

„Тимот архитекти од od-do architecture и Navor пристапија кон оваа одговорна задача со комбинација на младешка неоптовареност и зрела рационалност“ – нагласуваат авторите за ArchDaily.

ДВА НОВИ ПРОСТОРА ЗА ЗАЕДНИЧКА ИГРА

Преку тесна соработка со клиентите и идните корисници, архитектите препознале дека на градинката и треба повеќе од едноставно поставување на нови училници.

На градинката Учењак и бил потребен централен простор за собирање, како и правилно уреден и воспоставен влезен простор.

Со вешто реорганизирање на постоечката основа и воведување по два тома од секоја страна, успешно се воспоставени два нови простори за заедничка игра на сите деца во градинката.

Архитектите додале и три светли, модерно дизајнирани училници со прозорци од подот до таванот. Исто така, организирани се и нови простори за пространа и добро осветлена кујна и нова соблекувална.

„Во нашата работа секогаш ја нагласуваме општествената одговорност на архитектите како основа за донесување одржливи проектантски одлуки“, наведуваат авторите.

СУПТИЛНА ИНТЕГРАЦИЈА НА НОВА КОНСТРУКЦИЈА

Водени од оваа идеја, архитектите користеле дрво во комбинација со челични столбови и греди за изградба на анексот.

Овој пристап им овозможил суптилно да ги интегрираат новите конструкции со постоечката армирано-бетонска зграда.

Во согласност со прописите, обезбедено е градинката да ги има сите потребни влезови за различни возрасни групи, а тука се и отворени простори заштитени со настрешница, како и интегрирана клупа за седење.

Овие влезови се усогласени со оските на два паралелни ходника, каде стратешки се поставени заедничките игротеки и отворените простори со шкафчиња.

Како што дополнително објаснуваат архитектите, со трансформирање на нискиот простор на соблекувалната на поранешната оригинална зграда, се создало ново срце на градинката.

Освен оваа интервенција, внимателно се реконструирани периметарските ѕидови во приземјето, со цел да се внесе повеќе природна светлина, па така претходно ограничените подрачја се претворени во поотворени и поатрактивни простори.

ЗЕЛЕН ПОЈАС ЈА ОПКРУЖУВА ГРАДИНКАТА ОД ТРИ СТРАНИ

За да се приспособи проектот на зголемените просторни барања и потребата од поголеми отворени површини, набавено е дополнително земјиште на северната страна на градинката.

На овој начин овозможено е и формирање на неколку паркинг места.

Зелениот појас сега ја опкружува градинката од три страни, овозможувајќи да се постават сите елементи за игра на отворено.