Порта3 – градежништво, архитектура и екологија Порта3 – градежништво, архитектура и екологија
Град Скопје потпиша договор за почеток на реализацијата на европскиот проект Re-Construct, за креирање и пилотирање екосистем за имплементација на циркуларен модел за справување со градежен отпад.
“Со помош на овој пилот проект за прв пат некоја единица на локална самоуправа ќе го отвори прашањето со третирањето на градежниот отпад и шут од рушење, изнаоѓање на начини за негова иновативна пренамена и негова повторна употреба. Главната цел е да се зголемат и подобрат капацитетите на Град Скопје за транзиција кон циркуларна економија и одржлива ре-употреба на градежен отпад преку идентификација на диви депонии, нивно следење и интервенции за справување со градежен отпад“, вели градоначалничката Данела Арсовска.
Таа потенцира дека со имплементацијата на овој проект се зголемува подготвеноста на градската администрација и јавните претпријатија за имплементирање на иновативни решенија за управување со градежен шут, што практично е отпочнување на процесот и подготвеноста за транзиција кон циркуларна економија, а истовремено се пренесуваат знаења, искуства и позитивни примери од успешни ЕУ региони во насока на градење капацитети.
Со реализација на овој проект, Град Скопје ќе добие развиен циркуларен модел за управување со градежен отпад преку вклучување на сите засегнати страни, ќе се намали бројот на диви депонии, а ќе обезбеди и трајно решавање на проблемот со диви депонии. Исто така, со проектот Градот Скопје ќе добие и развиена апликација за следење и мапирање на диви депонии, како и комплетна дата база на податоци за диви депонии, чија подготовка е веќе во тек.
Со реализацијата на овој проект ќе се зголеми рециклирањето на градежен отпад на територија на градот, ќе биде поставена оперативна механизација за преработка на градежниот отпад, а ќе бидат обучени 30 технички лица за управување со механизација за преработка на градежен отпад, 20 градежници за ре-употреба на градежен отпад, а ќе биде изготвен и прирачник за ре-употреба на материјали и градежен шут.
Градоначалничката на Град Скопје, Данела Арсовска, министерот за локална самоуправа, Горан Милевски, евроамбасадорот Дејвид Гир, амбасадорката на Швајцарија, Вероника Хулман Марти, амбасадорот на Албанија, Фатос Река и голем број градоначалници, учествуваа на конференцијата за потпишување договорите за ко-финансирање и поддршка на проекти во рамките на две програми за финансирање од страна на Европската Унија (ЕУ).
На полето на подобрувањето на услугите преку иновативни концепти од проектот „ЕУ за општините“ поддршка ќе добијат осум единици на локалната самоуправа, додека во рамките на прекуграничната соработка од ИПА програмата на ЕУ ќе бидат поддржани 11 проекти на единиците за локалната самоуправа од три плански региони заедно со нивните партнер општини од Република Албанија.
