Германија: Поради проширување на рудник за јаглен, се демонтира ветерен парк

Ветерните турбини во близина на површинскиот коп на рудникот на јаглен Garzwiler во сојузната држава Северна Рајна Вестфалија, со кој управува германскиот енергетски гигант RWE, ќе бидат демонтирани со цел продолжување со експлоатацијата на лигнит, односно проширувањето на јагленокопот.  Ветерниот парк е пуштен во работа во 2001 година.

Според наводите на компанијата RWE, годишното производство на лигнит во рудникот Garzweiler, изнесува 25 милиони тони, додека експлоатационите резерви се проценети дека ќе траат до 2045 година. Првобитно, експлоатацијата била ограничена на подрачје од 66 квадратни километри во подрачјето Garzweiler 1, а ископувањата се проширени во 2006 година во секторот Garzweiler 2 на површина од 48 квадратни километри. Населението во неколку општини во областа западно од градот Келн, морало да бидат преселени со цел експлоатација на јаглен во ова подрачје. Со последново проширување, освен демонтирање на ветерниот парк, целосно ќе се расели и едно населено место.

Овие активности се во насока на зголемување на производството на електрична енергија во екот на енергетската криза. Сепак и RWE и сојузната држава каде се наоѓа овој рудник,  истакнуваат дека ќе се престане со експлоатација на јаглен до 2030 година. Климатските активисти протестираат против проширувањето на рудникот, и ја нарекуваат цинична и лицемерна.