Во Германија расте стравот од претстојната зима поради проблемите со испораката на гас од Русија, но и екстремно високите цени на енергентите. Голем број германски градови формираа кризни штабови и развиваат планови за вонредна ситуација. Тие планови предвидуваат и оспособување на хали во кои граѓаните кои не можат да го издржат товарот од високите сметки за греење, ќе можат да се грејат.

Штедење на јавното осветлување е мерка која веќе е на сила во многу градови. Се планира и намалување на внатрешните температури на просториите на 17 степени Целзиусови. Во Дизелдорф, властите апелираат на намалено користење на клима уредите, а во Рендсбург веќе е откажано лизгалиштето планирано во време на божиќниот пазар.