Герлиц – малиот град со великодушни донатори

Малиот германски град во покраината Саксонија, во близина на границите со Полска и Чешка, некогаш ја имал најлошата репутација во Источна Германија, особено според односот кон архитектонското наследство. Најголем број од објектите биле во очајна состојба.

Но, по обединувањето на Германија ситуацијата драматично се менува. Приказната ја започнуваат група ентузијасти во соработка со градските власти и поддршка од централната власт. Реставрацијата на околу 4.000 објекти вброени во регистарот на културно и историско наследство станува приоритет.

Се чини уште една вообичаена приказна за подемот на некогашна Источна Германија по обединувањето, но постои еден куриозитет – секоја година реставрацијата се врши со средства од анонимен донатор.

„Секоја пролет, почнувајќи од 1995 година, Градот добива на својата сметка 500.000 евра наменети за ревитализација на објектите. Знам дека граѓаните сакаат да му се заблагодарат на донаторот (донаторите), и јас би го сакал тоа, но за жал тоа е невозможно. Мора да го почитуваме барањето за анонимност“, вели градоначалникот на Герлиц за Deutsche Welle.

Трансформацијата на старото градско јадро за овие 20 години е неверојатна, а тоа го покажуваат и фотографиите.