Геотехнички и физичко-механички истражувања на црквата „Св. Ѓорѓија“ во Курбиново

Стручни екипи на Заводот за заштита на спомениците на културата и музеј – Битола во изминатиот период извршија геотехнички и физичко-механички истражувања за конструктивна консолидација на црквата „Св. Ѓорѓија“ во преспанското село Курбиново, соопшти Министерството за култура.

Паралелно со истражувачките работи на конструктивниот систем, реализирани се и истражувачки работи на ѕидното сликарство, со цел да се утврдат техниката на сликање, видовите и распространетоста на оштетувањата, како и нивните причинители.

– Направени се и дополнителни физичко-хемиски анализи на живописот од горните зони во црквата. Во изминатиот период беше изготвен и проект за конзервација на фрескоживописот, како и проект за изработка на привремен заштитен покрив врз градбата, – информира Министерството за култура.

По изведбата на заштитниот покрив, екипите ќе продолжат со истражувачките работи на архитектурата и на покривните елементи, а акцент ќе биде ставен врз утврдувањето на првичните висински коти на овој храм. Со тоа ќе завршат археолошките истражувања и ќе се заокружат истражувачките работи на архитектурата и на покривот.

– По заокружувањето на истражувачките работи и изготвувањето на проектната документација, ќе се пристапи кон непосредни конзерваторско-реставраторски работи на фрескоживописот за што ќе бидат применети современи техники и методи. Со претстојните конзерваторско-реставраторски активности, црквата „Св.Ѓорѓија“ во Курбиново ќе биде целосно заштитена и во внатрешниот и во надворешниот дел, – соопшти Министерството за култура.

Црквата „Св. Ѓорѓија“ е меѓу врвните остварувања на источнохристијанската култура и уште од 1952 година е прогласена за споменик на културата.