Франција со закон ја редефинира зелената индустрија

Законот за зелена индустрија, усвоен во Франција, означува клучен чекор кога станува збор за развој на зелената индустриска револуција во Eвропа. Се работи за преплетување на еколошката одржливост и економијата. Изработен преку опсежни консултации со граѓанското општество и други засегнати страни, законот ја мина парламентарната процедура и усвоен е како одговор на климатските предизвици, но и како конкретен одговор на Законот за намалување на инфлацијата во САД од 2022 година. Со овој закон можно е земјата да се позиционира на чело на еколошката трансформација.

Фокусот ан законот се три основни оски: финансирање на зелената индустрија, олеснување и забрзување на постапките за изградба на индустриските постројки и промовирање на еколошки одговорни јавни набавки. Клучните иницијативи опфаќаат креирање на програма наменета за млади до 21 година, со која ќе се поттикнат инвестициите во еколошка транзиција преку даночни олеснувања и ослободување од придонеси. Покрај тоа, законот ги промовира и животното осигурување и заштеди за пензија во насока на декарбонизација на малите и средни претпријатија. Посебен акцент е ставен на усвојувањето на еколошки критериуми во процесите на јавни набавки. Се издвојува и една нова мерка – C3IV, која стапи на сила на 14-ти март 2024 година. C3IV  е дизајнирана со цел да поттикне вложувања во виталните сектори на енергетската транзиција, како што е технологијата за батерии, ветерна енергија, соларни панели и топлински пумпи. Ова би требало да доведе до 40.000 нови работни места до 2030 година.  C3IV е клучна алатка во остварувањето на амбициите на Франција за намалување на емисиите на CO2 и промоција на одржлива индустрија.