Фостер проектира зграда висока два километри во Саудиска Арабија?

Се шушка дека една британска архитектонска фирма работи на проект за облакодер во Ријад, кој ќе стане највисоката зграда во светот кога ќе биде завршена.

Според пишувањето на архитектонското списание Architects’ Journal (AJ), реномираната британска фирма Foster + Partners моментално работи на мегависок облакодер северно од престолнината на Саудиска Арабија.

Облакодерот треба да се наоѓа во непосредна близина на меѓународниот аеродром, кој исто така се реновира според проектот на ова биро.

Доколку се изгради, овој облакодер од два километри (да, 2.000 метри) би станал убедливо највисоката зграда во светот. Да потсетиме, тоа е речиси 2,5 пати повеќе од актуелниот рекордер, облакодерот Бурџ Калифа во Дубаи, чија висина е, може да се каже, скромни 828 метри.

Зградата логично би станала и највисоката зграда во Саудиска Арабија, бидејќи ќе го надмине облакодерот Abraj Al Bait Royal Clock Tower во Мека, чија висина е „само“ 600 метри.

Овој проект го претставува вториот обид на Саудиска Арабија да ја изгради највисоката зграда на светот, со оглед на тоа дека Jeddah Tower со висина 1.000 метри моментално се гради во Џеда, проектирана од Adrian Smith + Gill Gordon Architecture.

Игралиште за архитекти

Саудиска Арабија моментално е најголемото игралиште за архитекти со својот мега проект наречен Neom. Меѓу нив е и 170 километри долгиот град наречен The Line, кој беше критикуван од Советот за човекови права на Обединетите нации.

Foster + Partners досега извеле голем број проекти во Саудиска Арабија, вклучувајќи ја и кулата Al Faisaliah, која, кога беше завршена во 2000 година, беше највисоката зграда во земјата.

Покрај мегависокиот облакодер и проектот за реконструкција на аеродромот во Ријад, бирото работи на проекти за уште два аеродроми, хотел и институт за истражување на корали.