Фостер го претстави проектот за проширување на Оксфорд

Архитектонската фирма Фостер + Партнерс неодамна го откри проектот за кампусот на Институтот за технологија Елисон (EIT) во Оксфорд, универзитетски град во Велика Британија. Иницијално основан како центар за истражување и развој, кампусот сега добива значително проширување.

Во овој простор ќе биде сместена и клиника за онколошки и велнес пациенти, како и простори за едукација и состаноци. Изградбата се очекува да биде завршена до 2026 година, а проектот на кампусот има за цел да постигне BREEAM Outstanding и WELL Platinum сертификати.

Проектот на Фостер ги урива традиционалните бариери меѓу истражувачите, научниците, лекарите и пациентите, создавајќи холистички пристап кон здравствената заштита и технолошките иновации насочени кон човекот.

Планот опфаќа две парцели, Littlemore House и Oxford Science Park, кои меѓусебно се поврзани со зелена патека.

Во соработка со пејзажниот архитект Фернандо Карунча, авторите на проектот се надеваат дека уште еднаш ќе успеат да воспостават доволна количина зеленило на оваа локација за да се подобри состојбата и на пациентите и на персоналот.

Адаптирани структури и нови павилјони

Кампусот Оксфорд е втор во планираната серија глобално меѓусебно поврзани истражувачки кампуси за Технолошкиот институт Елисон, покрај главниот објект во Лос Анџелес. Всушност, оваа локација има за цел да го унапреди партнерството на EIT со биотехнолошките и технолошките заедници во оваа област, создавајќи нови можности за истражувачка соработка.

Littlemore House е една од структурите што се адаптираат и се комбинираат со новите павилјони долж источниот периметар на имотот. Оваа историски значајна зграда сега ќе има организација во форма на буквата С, со централен зелен двор наменет за заедничко користење од страна на пациентите, научниците, истражувачите и вработените на клиниката.

Ширум кампусот, бројни функционални простори се смислено распоредени за да се поттикне вкрстена соработка и спонтани интеракции меѓу различни дисциплини. Така, на пример, Littlemore House нуди простор во кој се сместени библиотека и простор за учење и неформални состаноци и настани.

Содржини меѓу крошните

Исто така, се внимавало лабораториите да се проектирани да бидат пофлексибилни и да можат да се приспособат на растечките потреби на Институтот.

„Потопениот“ театар со капацитет од 250 седишта, кој е во дворот, а над кој се наоѓа водена површина, е централно место за организирање предавања и значајни настани.

Новата структура на имотот на Oxford Science Park, во кој се сместени дополнителни лаборатории и наставни објекти, е издигната на столбови, овозможувајќи и на вегетацијата и свежиот воздух да струјат под неа. Дополнително, дрвената купола сместена на врвот на оваа структура служи како место за собирање, разговори и организирање групни проекти.