Етно селото кај Нерези во завршна фаза на изработка

Во тек се завршните градежни работи на проектот „Македонско село“ кај манастирот Св. Пантелејмон во Горно Нерези, а Министерството за економија пред два месеци ја одбра фирмата „Тренд инвест“ за концесионер кој ќе стопанисува со комплексот. „Тренд инвест“ ќе ги врши хотелиерските, угостителските, туристичките и занаетчиските дејности, продажбата на сувенири и производството на храна. Изградбата на „Македонско село“, кое се состои од автентични куќи од разни краишта на Македонија, ја чинеше државата 5,4 милиони евра.

Проектот „Македонско село“ се гради повеќе од две години, при што градежните работи ги врши „АК Инвест“ од Тетово, надзорот го реализира „Евро консалтинг“ од Скопје, a eнтериерното уредување на традиционалните македонски куќи треба да го изврши фирмата „Бауер БГ“ од Скопје. Наградени и откупени трудови, на конкурсот за етно селото, се проектите на „Боград“ од Струга и „МС Проект Инженеринг” од Скопје.