Есен е „зелена престолнина“ на Европа за 2017 година

Германскиот град Есен ја понесе титулата „зелена престолнина“ на Европа за 2017 година, која ја доделува Европската комисија. На овој начин, на Есен му се укажува признание за транзицијата од загаден рударски центар во град познат по зелената економија.

Наградата го нагласува и значењето на активностите од областа на климатските промени, во согласност со подготовките за наредната конференција на оваа тема COP23 која во ноември 2017 ќе се одржи во Бон.

По повод ова признание, градоначалникот на Есен изјави: „Титулата е моќно препознавање на Есен како место значајно за заштита на животната средина и заштита на климата. Се надеваме дека конференцијата за климатските промени во Бон, и Есен како „зелена престолнина“, може да бидат позитивен импулс за промени ширум Европа и светот“.

Инаку, во минатото Есен бил еден од најглавните рударски центри за експлоатација на јаглен. Но, со цел да се сочува специфичниот биодиверзитет, изградени се зелени коридори и освежена е реката Емшер. Во некогашната индустриска област на фабриката за челик Krupp, изградени се рекреативни центри и велосипедски патеки. До 2020 год., Есен планира да ја намали емисијата на CO₂ до 40% . Емисиите на CO₂ веќе се намалени за 29,5% до 2011, споредено со референтната 1990 година.