Електричен автобус 15

Од денес па во наредните шест месеци електричен автобус кој што фирмата „Челиот моторс“ го отстапи на Град ќе сообраќа на линијата со број 15 од Карпош до Ново Лисиче. Станиците за полнење ќе бидат поставени на последните станици на оваа линија. Целта на овој проект е да се види ефектот врз животната средина и заштедата на средства, со цел да може да се планира модернизација на градскиот сообраќај.

Градоначалникот на Град Скопје, Петре Шилегов на денешната промоција на автобусот изјави „Автобусот е направен во согласност со последните технолошки трендови во оваа индустрија. Станува збор за енергетски ефикасен автобус што троши минимално количество електрична енергија и е опремен со систем за брзо полнење и има нула емисија на штетни гасови“, рече градоначалникот Шилегов.
Потсети дека годинава е предвиден буџет за субвенции за набавка на екоавтобуси во висина од 100 милиони денари и за приватните превозници во висина од 20 милиони денари, како и оти во Скопје веќе сообраќаат два екоавтобуси на гас, на линијата број 5 и на линијата број 2.
Со пробното користење на овој тип автобус Градот ќе може да процени дали тоа би било вистинско решение за јавниот градски превоз.

Автобусот е направен според последните технолошки трендови, троши минимално количество на електрична енергија и е опремен со систем за брзо полнење. За еден ден возење низ Скопје електричниот автобус ќе прави трошок за електрична енергија од 21 евро, што е многу помалку отколку трошоците за дизел гориво на двокатните автобуси кои се 121 евро за еден ден. Еден електричен автобус кој го произведува оваа компанијата чини околу 500.000 евра.
Како што кажа градоначалникот досегашното искуство од користењето на автобусите на гас покажало дека со користење на 30 вакви возила месечната заштеда за гориво е 140.000 евра односно за една година ќе се намалат трошоците на ЈСП „Скопје“ за 1,3 милиони евра.