Еко-кацига од природни материјали

Научниците од Кралскиот Институт за технологија (КТХ) од Стокхолм, направиле прототип на кацига за мотоциклисти која во целост е изградена од дрвена суровина. Посебно е интересна пената на база на дрво, која ја обложува внатрешноста на кацигата и која има неспоредливо подобри својства во споредба со стиропорот.

Професорот Ларс Вогберг, истражувач од Шведскиот кралски институт, вели дека „пената на база на дрво е добиена од целосно обновлив односно јаглеродно неутрален извор како што е дрвото.“ Новиот материјал е наречен „селуфом“ и особено ќе им значи на државите кои во континуитет се грижат за пошумувањето. Професорот Вогберг го развивал овој материјал во соработка со Ленарт Бергстрем, професор по органска хемија на Универзитетот во Стокхолм и Николас Чанг од научниот центар за дрво Валберг.

Кацигата е произведена во „Селутек“, фабрика од Стокхолм која е специјализирана за изработка на врвни материјали од дрво, со поддршка на шведската дрвна индустрија (Swedish Forest Industries Federation´s Ekoportal 2035). „Кацигите од дрво постоеле и порано, но ова е првата направена целосно од природни материјали. Надворешниот слој е направен од фурнир, ремените од посебно цврста хартија, а меките делови во внатрешноста од целулозни влакна“, објаснува Вогберг.

Авторите на проектот, кој го поттикнува одржливиот развој и заштитата на животната средина, сакале со овој потег да го свртат вниманието на пошироката јавност и да укажат дека целулозата од дрвото е природна алтернатива за материјалите како пластика и стиропор.