„Дом на секој чекор”- Павилјонот на Македонија на Експо Дубаи 2020

Павилјонот на Република Северна Македонија на Експо Дубаи 2020 – „Поврзувањето на умови, создавање на иднината“ од 1 октомври до денес го посетиле преку 50.000 посетители.

На најголемиот светскиот настан за оваа година земјата се претставува со слоганот „Дом на секој чекор” и под мотото „Нови можности”, а посетителите имаат уникатна можност директно да се запознаат со културата и традицијата на нашата држава, како и со природните богатства и туристичкиот потенцијал. Изложени се теракоти, артефакти, традиционални носии, промотивни материјали и видео презентации на Северна Македонија.

Посебен фокус е ставен на можностите за економска и трговска соработка, како и инвестицискиот и бизнис потенцијал на земјата, поради што поставени се и дополнителни информативни панели  за слободните економски зони, иновациите, земјоделството, енергетиката и туризмот.

Генералниот комесар на нашата земја за Дубаи Експо 2020 Бекри Ајдини во изјава за МИА вели: „Праќаме порака до сите посетители да се чувствуваат како дома. Во павилјонот со површина од 380 квадратни метри, 200 квадрати се изложба. Генерално се претставуваме на економски план. Околу 75 отсто од целиот павилјон го покрива делот на економијата, претставувањето на странските инвестиции, субвенциите кои ги дава државата, планот за економскиот развој, делот за енергетиката, но генерално и во делот туризам и нашите потенцијали. Освен тоа ја презентираме Македонија како држава каде живеат во кохабитација различни етнички групи, различни религии и исто така го покажуваме нашиот историски дел, богатата култура, споменици. Исто така во павилјонот донесовме две препарирани животни, балканскиот рис и златен орел, кои се карактеристични за нашиот регион и кои станаа атракција бидејќи се многу блиски до локалните жителите во Емиратите и исто така се преознатливи за нив. Посетителите можат да видат и етнички носии, кои се исто така карактеристични и ја претставуваат културата и традицијата во нашата земја“.

Ајдини потенцира: „Фокусирани сме и на туризмот. Затоа го претставуваме Охридското езеро нашиот летен туризам, зимскиот, Попова Шапка, како идна дестинација за туристи и ски центарот Маврово, но и другите сезонски туристички дестинации“.