Порта3 – градежништво, архитектура и екологија Порта3 – градежништво, архитектура и екологија
Вечер (17 мај) во 20 часот во Музејот на Град Скопје ќе биде отворено осумнаесеттото Биенале на македонската архитектура – БИМАС 2016, во организација на Асоцијацијата на архитекти на Македонија.
Насловот на овогодинешното Биенале е „Рециклирана архитектура“, а ќе трае од 17 до 31 мај.
Во рамки на БИМАС 2016, покрај биеналната изложба на селектирани трудови од македонската архитектонска продукција БИМАС 2016, традиционално поставена во Музејот на Град Скопје, биеналната изложба на студентите по архитектура БИСТА 2016 поставена во галеријата на „Мала Станица“, ќе се одржат и бројни предавања, изложби, презентации и промоции на поканети еминентни домашни и странски архитекти кои допираат, критикуваат, разјаснуваат, промовираат различни аспекти на главната тема на биеналето.
Поимот рециклирање според д-р Бојан Каранаков, архитект (претседател на ОО на БИМАС 2016), во овој контекст се однесува на потребата да се понудат нови одговори на урбаните елементи и програми кои во денешни услови се застарени и надминати. Денес, старото урбано ткиво или наследство нуди голема количина на објекти кои откриваат важни просторни, конструктивни и еколошки состојби на кои треба да се оперира со функционални методи.
Операциите на урбано рециклирање, реновирање, адаптација во ваквите градски подрачја, имаат за цел да ја спречат растечката продукција на „отпад“ и преку стратешки обмислена акција на реструктурирање и редефинирање да се воспостават нови врски меѓу градбите и нивното променето опкружување. Оваа тема е рефлексија на длабока дебата меѓу желбата за зачувување и потребата за интервенција и промени во нашето опкружување и следствено на тоа грижата за соодветните методи за дејствување.
