Данска: 20% повисока ефикасност на термоцентрала на биомаса

Во Данска започнува со реализација еден иновативен проект за конверзија на постоечка термоцентрала на биомаса, со цел зголемување на нејзината енергетска ефикасност. Проектот го спроведува енергетската компанија Ørsted и со него потрошувачката на пелетите како гориво во ТЕ Хернинг, ќе се намали за 20%. Станува збор за термоцентрала – топлана која е пуштена во погон уште во осумдесеттите години на минатиот век и првобитно била наменета за користење на јагленот како енергент.  Во 2002 година, објектот е реконструиран и адаптиран за користење на природниот гас како гориво, а подоцна  направена е уште една реконструкција со која како енергент е воведена биомасата. Електричната моќност на постројката изнесува 88 MW, а топлинската енергија за греење која може да се испорача во системот во текот на сезоната за греење е 171.000MWh. Со споменатиот проект во процесот ќе се додаде и постројка за кондензација на димните гасови со што ќе се овозможи искористување на дополнителна топлинска енергија, и на тој начин ќе с езголеми вкупната ефикасност на централата. Се очекува проектот да биде целосно завршен во 2019 година.