Casa Punta Cana во Доминиканската Република, отворена за карипскиот пејзаж

Потпишан од бирото Mareines Architecture, Casa Punta Cana е современа и отворена за карипскиот пејзаж. Сместена во Доминиканската Република, нејзината структура е проектирана да ги доведе во прашање концептите „внатре“ и „надвор“.

Барањето на клиентот, американско семејство, било удобна, голема, еднокатна куќа со неколку соби со иста големина. Органската структура, целосно отворена кон плажата и улицата, носи повеќе природна светлина и вентилација во „куќата на ветрето“, како што ја нарекува бирото.

Со неконвенционални и паралелни архитектонски линии, проектот е обмислен во смисла на одржливоста и со технолошки решенија кои сè уште не се користеле во земјата. Покрај ова, со исклучок на еден стол, целата декорација и мебел се од бразилски дизајнери во кои клиентите се вљубени, и тоа во дискретни бои.

Во северниот блок се сместени шест независни апартмани, секој со свој поглед и градина, а во јужниот блок се трпезаријата, барот, кујната, игротеката, теретаната и сите куќни сервиси. Во центарот се наоѓа „семејна соба“, планирана да биде место за средби на членовите на семејството кои живеат во различни земји и гостите.

Покрај стаклен цилиндар кој лебди среде водните градини, целата резиденција е опкружена по должината со голема веранда. Има 700 квадратни метри отворени и затворени сензации, извишувања и падови, разновидни форми и пејзажи во сите правци.

Високотехнолошките решенија се уште еден белег: Доминиканската Република, како и поголемиот дел од Карибите, е подложна на урагани со ветрови кои достигнуваат брзина од 300 километри на час. Затоа, за производство на елементите кои ги исполнуваат овие услови, применета е дигиталната технологија CAD – CAM (Computer-Aided Design / Computer-Aided Manufacturing), која се користи во земјите во Европа и Северна Америка.

Целата конструкција од лепено ламинирано дрво со двојна закривеност, што го формира кровот на верандата и апартманите, е дигитално произведена во Франција, како и челичните столбови што ја носат. Стаклените рамки и бакарниот кров направени се во Шпанија, а облогите и изолациите од вода и топлина доставени се од САД. Дополнително, за да се избегне надоаѓањето  на морето во случај на ураган, теренот е подигнат два метра во однос на првобитното ниво.

Сите конструктивни врски се внатрешни, што ја спречува оксидацијата што е вообичаена во крајбрежните региони. Кровното покривање со бакар, проектирано е да ја менува бојата според делувањето на морето, додавајќи убава патина на објектот.

Осветлувањето е претежно природно, преку „шлицовите“ што ги има куќата, менувајќи се како што минува денот и светлината „шета“ низ собите. Уредувањето на пејзажот, кое наликува на жива таписерија, ги обединува бразилските вертикални ѕидови со доминиканската хоризонтална градина.

„Работата со дигитална технологија на производство го менува прилагодувањето на работата од центиметарски до милиметриски. Иако нема индустрија, Доминиканската Република изобилува со одлични професионалци кои извршуваат висококвалитетна работа“, објаснуваат архитектите.

„Локалната работна сила направи голема разлика во завршната обработка на објектот. Покрај совршенството на локацијата, изградбата на темелите и бетонските елементи за челичните и дрвените конструкции, уметничкиот квалитет на камените, дрвените и бакарните завршетоци кои доминираат, естетската композиција на куќата не беше занемарен“, вели Matthieu Van Beneden.