Бесплатна летна школа на Енергетската заедница

Започна пријавувањето за третата по ред Летна школа на Енергетската заедница, која оваа година ќе се одржи во Сплит од 25-ти август до 1-ви септември 2018. Фокусот ќе биде на транзицијата на енергетскиот сектор, посебно во земјите од Југоисточна и Источна Европа, објави Енергетската заедница како организатор на оваа мултидисциплинарна и интерактивна програма. Школата е бесплатна за 40 избрани постдипломци, истражувачи во сите дисциплини кои се поврзани со енергетиката, млади професионалци од владини институции, компании и невладини организации до 35 години. Околу 30 предавачи, универзитетски професори, стручњаци и претставници на водечки компаии во енергетиката, ќе расправаат за различни аспекти на синџири на снабдување со енергија: економија, техника, политика, право и одржливост. Програмата е конципирана така што ќе им овозможи на учесниците подобро разбирање за комплексноста на енергетиката, да им се пружи платформа за размена на идеи, како и придонес во креирањето на иднината на енергетиката. Рокот за поднесувње пријави трае до 31-ви март.