Аукција на 85 дела на Миро

Колекција од 85 дела на шпанскиот надреалист Хуан Миро, која португалската влада ја купила од пропадната банка, ќе се најде на аукција проценета на 30 милиони фунти (49 милиони долари).
Аукциската куќа „Кристи“ вчера соопшти дека колекцијата е една од најсеопфатните и најимпресивни збирки во однос на овој уметник и опфаќа седум децении од кариерата на Миро.

Уметникот, роден во Барселона, беше влијателен член на надреалистичкото движење во 20-тите години на минатиот век. Својот карактеристичен живописен стил полн со симболи го развивал во текот на долгата кариера, која траела се до неговата смрт во 1983 година.
Оливие Ками од „Кристи“ соопшти дека аукцијата им нуди на колекционерите со различни буџети шанса „да уживаат во творечкиот гениј и разиграната непосредност на делата на Миро“.

Португалија стана сопственик на овие 85 дела од Миро кога била национализирана банката BPN за време на глобалната банкарска криза во 2008 година.
Аукцијата е планирана за 4 и 5 февруари во Лондон.