Архитектурата во Полска на изложба во Музеј на град Скопје

Вчера во Музеј на Град скопје се отвори изложбата „Вечност и миг“ организирана од Амбасадата на Република Полска во Скопје, како дел од одбележувањето на 100-годишнината од возобновувањето на независноста на Полска. Насловот на изложбата „Вечност и миг“ е инспириран од говор на истакнатиот полски архитект Лех Њемојевски (1894–1952), кој бил пропагатор на модерноста, но истовремено и прониклив истражувач на историјата на старата полска архитектура.

Изборот на објектите кои се претставени на изложбата претставува резиме на начините на претставување на Полска преку модернистичката архитектура по 1918 година, кога после 123 години таа повторно станала независна.

На отворањето на изложбата беше врачена и архитектонската награда „ТИГРИТЕ“ за најдобар магистерски труд на Архитектонскиот факултет при Универзитетот „Св. Кирил и Методиј“ во Скопје, која ја доделува редакцијата на полскиот месечник „Архитектура-муратор“. Добитник на овогодинешната награда е Ружица Минова.

Наградата се доделува во чест на тројцата полски архитекти: Вацлав Клишевски, Јежи Мокшињски и Еугењуш Вјежбицки, коишто се познати под името „Тигрите“ и се проектанти на објектот на Музејот на современата уметност во Скопје (1966).