Серија предавања за блатни екосистеми на Јос Ферхуфен во Скопје и Охрид

На покана на Граѓанската иницијатива Охрид ЅОЅ во Македонија доаѓа врвен научник за блатни екосистеми – проф. д-р Јос Ферхуфен, претседател на Европскиот огранок на Светското друштво на научници за блатни екосистеми. Ферхуфен ќе престојува во Македонија, поточно во Скопје и во Охрид, од 15 до 19 мај, годинава.

Во Скопје ќе одржи серија предавања на Природно-математичкиот факултет и ќе биде специјален гостин на тркалезната маса во организација на Здружението за заштита на животни и животна средина Е.Д.Е.Н. на тема „Влијанието на планираните инфраструктурни проекти врз биодиверзитетот во охридско-преспанскиот регион“, која ќе се одржи на 16 мај, а на која учество ќе земат видни научници од цела Македонија.

Потоа Ферхуфен заминува за Охрид каде што ќе го посети Хидробиолошкиот завод и ќе оствари работна средба со членови на Граѓанската иницијатива Охрид ЅОЅ.

Причината за неговата посета е опасноста од уништување на Студенчишкото Блато во Охрид – последниот филтер на езерото и дом и прибежиште на многу ретки и ендемски видови. Граѓанската иницијатива Охрид ЅОЅ две години непрекинато и посветено се бореше за заштита на Студенчишкото Блато што конечно вроди со плод и на последната стручна расправа во Општина Охрид беше потврдено дека Блатото останува строго заштитена зона. Сепак, целта не е докрај постигната бидејќи со заклучок на Владата од 2013 г. на Општината ѝ е наложено да се заштитат само 4 до 5 хектари земја што е драстично и неприфатливо помалку од 50-70 ха кои се предвидени со последната Интегрирана студија за Блатото. На Блатото не само што му е потребно да се заштитат сите негови делови кои се сè уште функционални, туку е неопходно и да се ревитализира она што било низ годините уништено.

Организаторите се надеваат дека со доаѓањето на проф. д-р Јос Ферхуфен во Македонија на надлежните ќе им стане појасно колку е важен опстанокот на Студенчишкото Блато за Охридското Езеро и зошто ако се уништи Блатото ќе се уништи и Езерото. Исто така, се надеваат дека научните факти и разумот ќе надвладеат над краткотрајните економски интереси, бидејќи ако регионот ги изгуби своите природни вредности ќе ја изгуби и економската придобивка.