Новиот лик на стадионот Грбавица во Сараево

Почесниот претседател на сараевскиот фудбалски клуб „Железничар“ Ивица Осим, во саботата на 1 април, свечено ја отвори новоизградената источна трибина на стадионот Грбавица во Сараево, со 4266 места за седење. Полните трибини ја поздравија најголемата жива легенда на клубот. Источната трибина е отворена по само три и пол месеци од започнувањето на работите.

Изградбата, која чинела 900.000 евра, во голема мера ја финансирале самите навивачи но и пријателите на клубот од земјата и регионот преку оригиналната акција „Купи седиште за европска Грбавица“ (Kupi stolicu za evropsku Grbavicu). Купени се 666 десетгодишни влезници по цена од 500 евра.

Овој стадион датира од доцните 40-ти години на минатиот век кога во повоено Сараево стадионот се градел со голем ентузијазам и активно учество на тогашната ЈНА. Во 1968 година стадионот претрпува посериозна реконструкција која завршува во 1976-та со свечено отворање и прв одигран натпревар под рефлектори. Северната трибина била изградена во 1986 година. Во текот на војната во БиХ во деведесеттите, стадионот претрпува сериозни оштетувања. Сепак, со последната акција донекаде е вратен стариот сјај и пристоен капацитет (вкупно 13.499 седишта) на овој култен стадион за навивачите на популарниот „Жељо“.