Голем проект за реновирање на Ајфеловата кула

Ајфеловата кула ќе претрпи сериозно реновирање преку огромен проект кој ќе трае 15 години, а ќе чини 300 милиони евра. На тој начин, ова здание треба да биде заштитено во децениите што доаѓаат.

Изградена пред 128 години како привремена структура за потребите на Светската изложба во Париз во 1889 година, Ајфеловата кула прерасна во глобална икона која секоја година ја посетуваат околу седум милиони луѓе. Но, пред сè, кулата стана симбол на француското единство и во славни времиња и во времињата на големите трагедии.

Проектот вклучува комплетна анализа на структурата, замена на целосното осветлување и лифтовите. Особено внимание ќе се посвети на подобрување на системите за безбедност. Проектот треба да добие согласност од Советот на Париз кон крајот на јануари. Секоја година за редовно одржување на кулата се трошат 13,7 милиони евра, а секоја седма година се врши комплетно бојадисување кое трае 20 месеци и се трошат 66 тони боја.