Препознатливиот телевизиски тест како главен акцент за светлечки тела

Унгарскиот уметник и дизајнер Симон Форгач отсекогаш бил фасциниран од изгледот на карактеристичниот тест на телевизискиот екран. Геометријата, силниот колорит и целокупната шема за своевидната калибрација и приспособување на телевискиот сигнал на сликата пред емитување, се неговата инспирација за најновите дела.

Всушност, тој бил доста фасциниран со овој феномен уште од детството во време кога телевизија и тв приемниците биле кулминација на технологијата, а денес овие тестни телевизиски екрани му се база за неговите светлечки тела кои ги работи.

Се работи за Mono Lamp светилки, кои се во форма на глобус, но се „пресвлечени“ токму со гореспоменатата визуелност. Тие се направени од дрво и алуминиум, со дијаметар од 30 см, додека самата топка е направена од пластика. Крајниот резултат е амбиентално осветлување кое на просторот му дава необичен, но тотално „кул“ впечаток.