Ново седиште на ЕУ – „вселенско јајце“ од 321 милион евра

Мината седмица во Брисел беше претставено новото седиште на Советот на Европската Унија и Европскиот совет. Градбата, која колоквијално е наречена „вселенско јајце“ поради обликот на централниот дел, официјално е наречена „Европа“ и ќе служи за работа на овие институции со оглед на тоа што постоечката зграда Justus Lipsius се покажала како премала за моменталните потреби на ЕУ.

Постепеното преселување на двете институции во новиот објект ќе биде завршено следната година, а инвестицијата вреди 321 милион евра. Минатиот викенд 2000 граѓани имаа прилика да ја посетат завршената зграда и да имаат увид во сите простории пред тоа да го направат лидерите и министрите од ЕУ.

Централниот дел на објектот се состои од три простории за самити и средби од големи размери со над 30 кабини за преведувачи, кафетерија и околу 250 канцеларии. Изградбата на новото седиште е одобрена уште во 2004 година, кога е одлучено сите самити на Унијата да се одржуваат во Брисел, а не во седиштата на земјите членки.

Со оглед на тоа што сегашната зграда Justus Lipsius, која е изградена во 80-тите години од минатиот век и која Унијата ја користи од 1994 година кога бројот на земји членки бил на половина од денешниот, морало да се размислува за обезбедување поголем простор.

Зградата „Европа“ е проектирана од конзорциум од европски архитектонски компании вклучувајќи ги Samyn and Partners, Studio Valle Progettazioni и Buro Happold. Нејзината изградба е во целост финансирана од буџетот на ЕУ. Архитектот Philippe Samyn користел  3.750 дрвени профили за прозорци на северната и источната страна од објектот, со цел да го промовира рециклирањето на материјали и да му оддаде почит на европското културно и занаетчиско наследство.

„Зградата ʼЕвропаʼ е спој на модерното со историското наследство. Историјата на оваа зграда ни овозможува да зачекориме во историјата на Европа“, вели тој. Преку два пешачки моста зградата „Европа“ е поврзана со зградата „Justus Lipsius“, а во надворешниот дел се остатоците на некогашната резиденцијална палата која за време на Втората светска војна, додека Брисел бил под окупација, служел како нацистички штаб.