Копенхаген добива нова црква, прва по 30 години

Новата црква во главниот град на Данска ќе биде мост меѓу културните и духовните активности на жителите на овој живописен град.

Архитектонското студио Jaja Architects, во соработка со Søren Jensen engineers, победи на конкурсот за идеен проект на црква, која ќе биде прва во Копенхаген од 1989 година. Предложеното решение е осмислено како еднокорабна структура изградена од бели тули, додека внатрешноста е целосно направена од дрво.

Водата е интегрирана во проектот заради својата улога во христијанската вера, но и поради влијанието на непосредната околина во која се наоѓа пристаништето.

Проектот на студиото Jaja Architects има за цел да формира простор во кој ќе се воспостави рамнотежа помеѓу духовниот живот на човекот и урбаниот живот на целата заедница, пишува Designboom.

Планот е црквата да биде на располагање на јавноста, за рекреација и дружење и кога религиозните церемонии не се одржуваат. Скалестата структура на објектот го повикува населението да се искачи на нејзиниот врв и да ужива во поглед на градот.

Спиралното движење по скалестата структура на објектот овозможува влез во дополнителните содржини на објектот.

Низата од канали е организирана преку целата скалеста структура на објектот. Од изворот на врвот на црквата водата ќе тече се до подножјето. Протокот на вода ќе станува подраматичен за време на посилните дождови, но неговото движење ќе биде контролирано.