Југоисточна Европа со нерамномерен развој на обновливите извори на енергија

Повеќе невладини здруженија објавија нови статистички податоци кои покажуваат дека Југоисточна Европа остварува напредок во насока на зголемување на одржливоста во енергетскиот сектор, но истиот е прилично нерамномерен од земја до земја. Емисиите на CO₂, загубите на електрична енергија и енергетската интензивност бележат пад во најголем број од земјите во овој регион, но забележан е мал напредок во зголемување на уделот на соларната енергија и енергијата од ветерот, како и во борбата против корупцијата.

Статистиката се однесува на седум држави – Албанија, Босна и Херцеговина, Хрватска, Косово, Македонија, Црна Гора и Србија. Емисиите на јаглероден диоксид по жител, предизвикани од согорувањето на фосилните горива се намалиле помеѓу 2010 и 2014 година во сите земји освен во Босна и Херцеговина и Албанија. Меѓутоа, постои можност падот на нивото на емисиите во Србија да е предизвикан со поплавите во 2014 година. Хрватска користи највеќе енергија од сонце и ветер во регионот. Загубите во преносот и дистрибуцијата на електрична енергија во периодот 2010 – 2015 година се намалиле во сите земји освен во Албанија. Косово највеќе зависи од јагленот кој во 2014 година има генерирано 97% од електричната енергија во земјата. Македонија и Србија се на второ односно трето место според електричната енергија добиена од јаглен, чиј удел за истата година изнесува 69,5% односно 64,8% соодветно. Во споредба со тоа, ЕУ во 2014 година остварила само 26,3% производство на електрична енергија од јаглен. Енергетската интензивност – количина на енергија потрошена по единица БДП, исто така бележи пад во сите земји во периодот 2010-2014, освен во Босна и Херцеговина и Албанија.

Во периодот 2010-2015, сите земји забележале подобрување во однос на индексот за перцепција на корупцијата на Transparency International, освен Македонија и Албанија.

„Утешно звучи фактот, што речиси сите земји од регионот имаат потенцијал да го намалат користењето на фосилните горива, но истовремено треба да загрижува опасноста некои земји да бидат и правно одговорни поради подпросечните резултати, доколку не се имплементираат ургентни мерки“, коментира Драгана Милеусниќ од организацијата Climate Action Network Europe. Извештајот е достапен на следниот линк: http://seechangenetwork.org/sustainable-energy-how-far-has-see-come-in-the-last-five-years-south-east-europe-energy-watchdog-report-2016/