Порта3 – градежништво, архитектура и екологија Порта3 – градежништво, архитектура и екологија
На третиот конкурс за откуп на уметнички дела, кој Министерството за култура го распиша во мај годинава, избрани се 44 дела од визуелна уметност на 33 автори и шест скулптури од галериски формат од ист број автори. На конкурсот пристигнале 69 пријави за 178 визуелни уметнички дела и 17 пријави за 29 скулптури.
Делата за откуп се избрани од стручна комисија во состав: Викторија Васева–Димеска, Муамер Садику, Конча Пирковска и Маја Неделковска-Брзанова.
Со нив вкупно, од трите конкурси досега (2014, 2015 и 2016), откупени се 163 дела од 119 автори, а од буџетот се издвоени околу 22 милиони денари.
Се работи за една од стимулативните мерки во Националната стратегија за култура (2013-2017) чија цел е да ги збогати фондовите на националните установи од уметноста, како Музејот на современата уметност и Националната галерија на Македонија, да го поттикне домашното уметничко творештво и да го унапреди статусот на ликовните уметници.
Викторија Васева-Димевска, член на комисијата за избор на пријавените дела, истакна дека овој проект покажува дека се има желба, волја и почит за уметноста и уметниците во, како што рече, динамично и турбулентно време.
– Особено ме радува што овој пат имавме можност да ги разгледаме понудите од приватните збирки и галерии кои понудија завиден број квалитетни дела од основоположниците на македонската ликовна уметност и од постарите генерации македонски ликовни творци, со чиј откуп се задоволува дел од потребите на институциите од оваа област – музеите и галериите, рече Васева-Димевска.
Уметникот Антони Мазневски ја поздрави иницијативата на Министерството за култура која се реализира трета година. – Таа е од огромно значење за секој автор и за уметничкото творештво, особено затоа што сме општество со многу мал пазар за ликовната уметност. Тие дела ќе си добијат репрезентативен јавен простор, рече Мазневски.
Директорката на Националната галерија на Македонија Дита Старова-Ќерими истакна дека благодарение на овој проект значајно се збогатил фондот на уметнички дела на НГМ – вкупно 34 од двата претходни конкурса.
Меѓу авторите чии дела се откупени на третиот конкус се: Никола Мартиноски, Лазар Личеноски, Димитар Аврамов Пандилов, Ристо Лозановски, Миле Корубин, Димитар Кондовски, Драгутин Аврамовски- Гуте, Спасе Куновски, Танас Луловски, Глигор Чемерски, Александар Јанкуловски-Цане, Ана Темкова, Теофил Шулајковски-Тофе, Кирил Гегоски, Ванчо Георѓиев, Жанета Вангели, Благоја Маневски, Александар Станкоски, Милош Коџоман, Никола Иванов-Балтон, Трајче Николовски, Сергеј Андреевски, Решат Амети, Константин Качев, Синиша Кашавелски…, а автори на откупените скулптури од мал формат се: Станко Павлески, Власе Николески, Петар Хаџи-Бошков, Томо Бундовски, Антони Мазневски…
