Дела на Банкси го окупирале центарот на Рим

Дури 150 дела на британскиот уличен уметник Банкси изложени се во музејот на Palazzo Cipolla во центарот на Рим. Всушност, тоа е најголемата организирана изложба посветена на овој мистериозен уметник, а која се одржува во рамките на изложбениот проект наречен War, Capitalism and Liberty. Изложбата ќе биде отворена до 9 септември.

Делата на Банкси се поделени во три категории, односно во три теми кои се спомнуваат во насловот на проектот. Она што е интересно во сето ова е дека сите 150 дела се автентични и оригинални, а во текот на три месеци пристигнувале од колекционери од целиот свет.

Да се потсетиме, Банкси е уметник чиј идентитет се уште е непознат, и покрај многуте обиди за негова демистификација. Тој со своите дела, завиени во сатира и со преиспитување на актуелни општествени и социјални теми, ги заинтригира љубителите на уличната уметност, па дури и оние што тоа можеби не се.

Неговите дела во меѓувреме, се нашле како во рацете на почитувани трговци на уметнички дела, така и кај некои познати личности.