Tематски парк посветен на виното се отвори во Бордо

Вчера во францускиот град Бордо се отвори тематски парк за возрасни посветен на виното La Cite du Vin. Тој всушност претставува еден вид на комбинација од тематски парк и музеј во оваа престолнина на рајскиот пијалак.

Овој објект претставува атракција со својата необична форма и со изложбените содржини, работилници и други разновидни понуди.

Скулпторскиот објект со височината од 55 метри со заоблена стаклена фасада, е импозантна градба дизајнирана од страна на француското архитектонско студио XTU и англиските експерти за дизајнирање на музеи Casson Mann.

Идејата на архитектите била со формата да имитираат вител на вино во чаша, но исто така, и изглед на камен типичен за пејзажот на Бордо, пишува Contemporist.

Во внатрешноста на објектот постојат голем број простории посветени на различни активности. Најинтересен е секако оној за тестирање вино.

Од врвот на објектот има беспрекорен панорамски поглед на Бордо. Видиковецот, покрај убавиот поглед, го украсува и необичен лустер направен од илјади шишиња вино.