Гостување на „МБМХП“ на архитектонскиот факултет во Тетово

Во просториите на Архитектонскиот факултет на Тетовскиот универзитет, беше одржано предавање на коешто како гости беа професорите по архитектура од Архитектонскиот факултет во Скопје, Минас Бакалчев и Митко Хаџи Пуља, а кои работат и како архитекти под заедничкиот назив „МБМХП“. Предавањето беше одржано под наслов „Учење архитектура – клучни зборови“, а студентите по архитектура од овој универзитет имаа можност да слушнат и да видат неколку примери и техники на учење на архитектурата, кои овие двајца професори ги употребуваат при предавањето на своите знаења на матичните студенти.

Предавањето беше концепирано и водено според некои основни архитектонски термини, кои од страна на професорите беа детално објаснети и пластично доловени со конкретен пример од нивното работно и творечко искуство. Интересно беше да се присуствува на вакво предавање не само поради тоа што ова беше ексклузивна привилегија за тетовските студенти, туку и поради фактот што од овие професори секогаш може да се научи уште нешто ново и интересно за архитектурата.